الصفحة الرئيسية الأرشيف
التاريخ: 3-سبتمبر-2010    العدد:6159 ونسة(الأرشيف) تاريخ اليوم: 20-ديسمبر-2014
  


 الأرشيف




free counters
 ونسة(الأرشيف)
محمد شريف:  في ضيافتنا الليلة المتجبجب الدوكي، زول سوداني كامل الاوصاف صاحب تجربة فريدة ومتميزة قديمة وجديدة وشديدة، بها تفاصيل لمعاناة حقيقية انتهت بابداع ونجاح متواصل على الصعيد العملي والعاطفي والاجتماعي.. تجربة شاب انتقل من طيبة القرية الى شر المدينة، ومن طرطيبة الحلة الى سخانة الخرتوم، ومن عفوية وتلقائية البلد إلى تكلف وزهجنجية البندر.. تخرج في جامعة الفرع وحصل على شهادة عليا، وعمل خلال ذلك في مهن مختلفة في عصامية وصبر وقوة تحمل.. التقينا به أمس وروى لنا بطريقته المعهودة السنارية الحلمنتيشية تجربته وكيف دخل بالباء وفتح كي كي.
٭ أولاً بالتبادي كدي نمّ لينا نمة نمتين تلاتة، ويا ريت لو كانت نمة فوق الخريف من نمات أهلكم العروب؟
سلام عروب سلام.. برق القبلي رفرف حاجبو
يلكز في السحاب.. لكز الزول حمارو العاجبو
تيرابكم مرق.. شاق لغب الارض بي نايبو
ورتابا صغار.. راجي المطر وهبايبو
٭٭٭
سلام عروب سلام.. اصلو الزراعة فريضة
اخلصوا للارض.. والاحسن كمان رميضا
تديكن لقم حارة وحلال ونجيضا
ادن يا خوي قريب.. شوف ام دقوقة لضيضة
٭٭٭
سلام عروب سلام.. بشاير خريفكن لاحت
ورف القبلي فوق... ريحة دعاشكن فاحت
حنتوتكن مرق.. والطندب عروقو ارتاحت
يقبضوا في القبور الشفع.. والسخيلات صاحت
٭٭٭
سلام عروب سلام.. اتقلع سحابنا صعيد
سايقاهو الهبوب.. بأمر من السيد
ترسوا للارض.. كمدوبنا او دنقيد
ياها باقيالنا الارض.. ياها الارض.. بتفيد
٭٭٭
سلام عروب سلام.. داخلة العصا الرويانة
تبكي على الضراع.. مودعة العصا العطشانة
نترت نترتا... وجبهتا النديانة
بالمطر الهتون.. الطرفة جات قاصدانا
٭٭٭
سلام عروب سلام... للكدنكات حكوا
وعرعروا للدحوش... الليلة الدحيش يوم سكو
طرقوا للملايد وفي المشاريع ركوا
عوافي اخوان البنات.. الليلة يومكن جكوا
٭٭٭
سلام عروب سلام.. أهل الشكرة والدلوكة
سلام أهل القراريص.. وباميتا المفروكة
ما جابوا الدشوش ما شربوا لينا الكوكا
ما شافوا الخرتم.. ما سمعوا بي بانكوكا
٭٭٭
سلام عروب سلام.. أهل العرضة والصقرية
سلام أهل اللقم.. دي ملاحا متموم موية
ديل دشهم دوام.. محكاكا والطورية
شايفين همهن دايما يغفروا السية
٭٭٭
سلام عروب سلام .. الليلة كيف اصبحتوا
سلام أهل العرض... في هايفة ما تفرشختوا
الرادي أب حجار.. كم موجة فيهو فتحتوا
ضاربين همبريب حدبا.. مسقى التحتو
٭٭٭
سلام عروب سلام.. راكبين حمير ودحوش
ورادفين العيال.. ناس عبده ود الحوش
ما لموا القروش.. ما سووا بيها كروش
ضاربين همبريب.. بلدا عدوها دشوش
٭٭٭
سلام عروب سلام.. دي ملودنا والمحكاكا
سلام اهل الكرم.. الحلة والمفراكا
ما ضربوا البيوت.. ما قالوا سيب يلاكا
مارقا الحلة ست.. يوم جاتن الكراكا
٭ قبل جيتك للخرتوم كنت في ياتو فريق؟
- من فريق الشمباتة بولاية سنار من اسرة متوسطة الحال. وانا الابن الوسطاني في اسرة متوسطة الحال وده كان سبب في رحلة شقاء متواصل انتهت نهاية سعيدة بحصاد يسر الناظرين والحمد لله.
٭ الابن الوسطاني مفروض يكون مرطب وما شايل هم؟
- انا دفعت تمن اتجاهات اخواني الكبار السياسية الحمراء، فاتجاهاتهم اليسارية دخلتهم المعتقلات، وكانت سبب في تأخيرهم في سنوات الدراسة بالجامعات، لذا اختل النظام والترتيب الاسري، وكان على ان اتحمل المسؤولية وادخل الجامعة اقرأ اربع سنوات واتخرج عشان اشتغل ودي كانت امنية الوالدة والوالد.
٭ ما مشيت في دروب اخوانك الحمراء؟
- أنا منذ الثانوي كانت ميولي ادبية وفنية، لذلك لما خشيت جامعة القاهرة فرع الخرطوم كلية الاقتصاد كنت ببحث عن منبر للشعر والفن، ولقيت نفسي فيه، وفي الجانب الخدمي من العمل النقابي وده وصلني لان اكون رئيسا لرابطة ابناء النيل الازرق بالجامعات والمعاهد العليا وانا في السنة الثالثة، يعني ما اختيار سياسي، ووقتها في 9791 كان التيار الطاغي هو تيار الجبهة الديمقراطية، وكان في صراع متواصل مع الاسلاميين.
٭ وإنت بعد سنوات طويلة انتميت للاسلاميين وبقيت جبهجي؟
- ما اسلامي بالمعنى الحرفي الانتماء للمؤتمر الوطني، ما لانو عندي رأي فيهم، لكن طوال دراستي الجامعية ما كنت معاهم ولا كنت شيوعي ولا كنت بعثي ولا في اي حزب سياسي، كنت زول اهلو موصنو يقرأ ويتخرج ويشتغل. وكنت زول خدمات وشعر وادب.
٭ وانت جاى من الاقاليم للعاصمة الخُلعة كانت كبيرة خاصة ناحية اركان النقاش؟
- كنت فخور جداً وانا بشوف وجها لوجه محمد نجيب محمد علي والتيجاني سعيد وأزهري محمد علي وعبدو سري ومحمد عبد القادر، وكانوا عندي أهم من كل السياسيين.
٭ لقيت منو من ناس الحلمنتيش في الفرع؟
- انا اول من اسس مجموعة حلمنتيش ومنتدى ثابت، بجانب الوان الشعر لاخرى التي اكتبها وارددها في الجامعة. وظهرت وقتها مجموعة الجو الرطب في كلية التجارة ناس ربيع طه وطارق الامين، وتكونت فرقة تيراب ناس غزالي ومحمد مجذوب وهمبريب والهيلا هوب، وكنت بسمع بهيئة حلمنتيش بجامعة الخرطوم واقرأ للمتجهجه الأممي.
٭ أسرتكم فيها شعراء كتار؟
- الشعر في جيناتنا جوه من جدودنا وحبوباتنا، واشتهرنا بأننا فصيحين، والوالدة ليها دور في معرفتي لنظم الشعر، وكانت بتكتب عن تجربة حقيقية، واذكر سنة 1791 وانا طفل في المدرسة الاولية اعتقلوا اخوي الكبير الخير بعد احداث يوليو، وكانت والدتي بتصحيني وانا نايم جنبها في القطية وتولع لمبة حبوبة، وتمليني الشعر وانا اكتبو، كانت عايشة في جو شاعري جنبها قهوتها وتولع سجارتها وتدخن وتكتب الشعر وسط الدموع.
٭ بتتذكر شيء من اشعارها؟
- كانت معظمها عن ولدها الكبير الخير المعتقلنو، وهو ركازة البيت، والمتزوج يا دوب وزوجته حامل، وكانت بتكتب عن والدي الاتزوج مره تاني، وبتتخيل اسماء لاولاد اخوي الخير، والغريبة بعد سنوات اتحقق حلمها واطلق نفس الاسماء على اولادو وبتقول مثلاً «يا أبو صابر يا ابو نزار في حكم الله ما عندي انكار».
٭ في الحلة قبل تجي جامعة القاهرة فرع الخرطوم علاقتك مع الجنس اللطيف كانت كيف؟
- البت عندنا يا اخت يا بت عم يا بت جيران يا ضيفة، يعني لو قربت منها شديد تكون انت في طرف العنقريب وهي في الطرف البعيد وما مرتاح، وانا لغاية الثانوي كنت ساكن في داخلية، ولما جيت الخرطوم لقيت مجموعة من الاناث أكثر من الذكور، والطالبة بلا خجلة ممكن تقعد جنبك في الكنبة وشعرة جلدي كلّبت.
٭ قلت شعر في الفرق بين حروم الحلة وحروم الخرطوم؟
سلام حروم سلام.. ما عرفن خلط في كلالي
ما ضربن خشومهن زي الشحم في بلالي
ديل شدن حمير شالن بقج ومخالي
ما فتحن كرج أبواب شبح وليالي
٭٭٭
سلام حروم سلام.. ديل دوكتن حماية
اتنادن فجر.. ديل كسرتن رماية
مترارن رقص.. صرجت حدا الغوغاية
حفرن ساس متين.. ناويات بنا الدوراية
٭٭٭
سلام حروم سلام.. راميات مقانع التوب
عايسات كسرتن.. حالبات الشياه طنوب
ما لهن والرغيف.. والحل غباشة روب
تستف شاربا والباقي تمو هبوب
٭٭٭
سلام حروم سلام.. شايلة الحطب يوم فازعه
اتوقت سمح.. في خريفا حاشة وزارعه
موضة بت ديور.. تاركاها حفيدة رابعه
بنشوفك نجم.. ساكن سمانا السابعة
٭٭٭
سلام حروم سلام.. ما أحلى الخمار مع توبك
انبذى للقصير.. خلي اليطول عرقوبك
سويلك عمل.. ينزل معاك يوم طوبك
ما بنفع عويل.. نار القبر حي ووبك
٭٭٭
سلام حروم سلام.. من قوز بلعو لاعن سنجة
لاخات العجين والقرقريبة كمنجة
ما عوجن خشومهن سون كلام افرنجة
مستورات دوام توبهن مطرز قنجة
٭ وفضلت ود القرية ولا قلبت ود المدينة؟
- ما بكضب ما اتنازلت عن مبادئي.. يعني كنت باكل العصيدة وابعد من الفول وببعد من البت اللابسة موضة اوتماتيكلي، وبقرب من اللابسة توب بحس فيها بحنان الاهل في ناس حبوا انتمائي ده وشجعوني، وناس ما عجبهم كلامي لما كنت بقول في الحلمنتيش.. الرجال بي جاى والنسوان بي جاى ومعاهم اللابسين بناطلين.. لكن برضو مرات باخد لي مسوح واتريح آخر ريحة.
٭ قلت شنو في النقلة الحضارية دي؟
- المفارقة انو انا لما ذاعوا نتيجة الشهادة كنت معلق لي في سقالة في أقصى الدندر بمنطقة دمبس، وجبت نسبة «86%» كان مفروض ادخل جامعة الخرطوم. ودخلت كلية التجارة، ورسلت لامي قصيدة وقلت ليها التجارة دي قراية يعني ما تقولوا دايرين التياب والبضائع، وضحكت جداً من الرسالة. واول قصيدة كتبتها في الخرطوم.
٭ سمعنا ليها؟
سلام يا يمة كيف حالك.. وما اظن ناسياني من بالك
سلام لابوي وللجيران.. سلام للشيخ.. وللحيران
قديم وجديد يا يمة بطره.. وانا العايش على الذكرى
بتذكر كلامك داك.. وندهك داك.. ولي شيخك هناك مرحوم رحيمو الله
نادهاهو هدا الحنَّان.. دربو على الامتحان
ادخل جامعة الخرطوم.. اكان العين تضوق النوم
شيخك نام.. يا يمة.. وانتي ما نمتي
بتذكر زعلتك ديك.. سؤالك داك
ما لو الشيخ.. مستكتر على وليدي جامعة الخرطوم
ومالو الشيخ مشمت في وليدي دا الجنيات
يمين شايلالو ربع رايات
وسماحة الراية في الضرعات
وقام ولدك اخو الجنيات
وصل ولدك الخرتوم
ناسا قالت شهادتو دي بتقري
وناسا قالوا للقاهرة بتودي
وناسا قالوا القاهرة بعيدة على
فرعها الفي الخرتوم هنا أقرب لي
fuculty of commerce
وصلك منو دا الجواب وقالولك
ولدك قال ولدك قال وقلتيلهم
التجارة وين لاقيلا راس مال
لا يا يمة.. التجارة دي قراية
واسمعي سمح.. الحكاية مو حكاية
جيت يوم جيتا يا يمة
اريت كما جيتا يا يمة
بطلت السفة والحقة
اقول الجرعة للبقة
كتير وكتير حصل تغيير
تعرفي رقية يا يمة؟! اسم رقية يا يمة
عندهم ريري يا يمة..
واعفي لي.. يا يمة بقولولا سوري يا يمة
نسيتو خلايا والباجة
وعامل فيها خواجة
ودائما say
look ديك كيسها ما جا «look»
حاجة iam ineed of
وكل الناس lik this
و like that
مش احسن ابقى خواجة!!
ملحوظة صغيرة
بقيت دعاية لبان بلي
ولي بت اختك ياني المخلي
والسلام ولدك المجلي
المتجبجب الودكي
٭ لقيت مشكلة في التعامل مع بنات واولاد البندر؟
- بدون نرجسية كنت موفق جداً في مرحلة خطرة، وبدون رفعان نخرة، انا تجربتي يمكن تصبح برنامج عمل لجيل كامل لنتائجها الايجابية، انا اثناء الجامعة اشتغلت بناء عشان المصاريف، وبنيت مساطب داخل مباني اتحاد الطلاب، وبنيت بيوت في شمبات والدروشاب، واشتغلت سواق تكسي، ولما اتخرجت في مارس سنة 3891م كنت مقاول ومعلق في سقالة برضو وماسك القدة والمسطرين.
٭ اشتغلت بي شهادتك وين بعد التخرج؟
- سنة 4891م بقيت معلم كبير ومقاول وسواق تكسي مفتح، وانا معلق في سقالة في بحري سنة 5891م
نزلت منها واشتغلت مندوب مبيعات في شركة ادوية اميركية براتب 002 جنيه، ودفعتي الاتخرجوا واتوظفوا كانوا بقبضوا 07 جنيها وكنت بركب عربية بها رسم شعار لادمون منير، وكنت اول من وزع كرتونة بندول مصنعة محلية، وعرفت مصطلحات الصيادلة وكلام الاطباء الكبار وبقيت مبسوط واتزوجت.
٭ اكيد بعد كمية من الشواكيش؟
- رصيد معتبر لله الحمد والفضل، والزواج قسمة ونصيب، لكن في السودان في الثمانينيات كان في موضة الاغتراب، واي زول كان بحب زميلتو يتلفت منها جاى يلقي واحد مغترب قاشي الدرب يجي البيت يختفها يخلي خشمو ملح ملح، وحصلت وقتها تغيرات اجتماعية نتيجة الشواكيش، لكني استفدت من معاناتها في ابداع حلمنتيش وشعر خاص جداً ما وريتو زول الى الآن.
٭ قلت شنو في الريد والغرام؟
بريدك ريدة مختلفة.. بريدك ريدة بطالة
وأريدك لما اتوفى.. اشيلك انتي في قلبي
وقلبي الشايلو في كفة.. بريدك ريدة مختلفة
٭٭٭
يا شعفوفة المطر.. يا الزيطة ويا الزفة
وبريدك ريدة مختلفة
٭٭٭
ريدتك جايطة في الفشفاش.. بريدك مرة زي هاف ماش
ولما تقولي زول غشاش.. برجع ليك باك.. قشاش
ببقى هجومك اترفه
ويبقى حبيبك انزفه
ونرجع تاني للصدفة
واريدك ريدة مختلفة
اجيك وماشي في لهفة.. اشوفك ازحلق السفة
اهبش جيبي استعداد.. افكر في الجرية والوقفة
واريدك ريدة مختلفة
٭٭٭
اريدك زي فجل شمبات.. واختك انتي في قفة
واريتها تعجبك القفة.. أشيل القفة في خفة
واخت القفة في كتفي.. اسك الباظ اكان الفى
افوتني الباظ.. واتفن... عليك يا الله والقفة
أدس القفة من الناس... أخيت شفة فوق شفة
اشيل القفة في خفة.. أخت القفة عند الضل
وأبعد غادي من الضل.. شفتو الريدة والعفة
٭ قلت شنو في الشواكيش
والله شنطحوا بينا الزوغونا وجابوا
والله بنطحوا بينا ناس عصام وشهابو
ختفوا من عينيا.. ناس وداد ورحابو
لبسونا شرائط وفوق رؤوسنا الكابو
بالكثير طرحوبنا.. ونادوا لينا جنابو
٭٭٭
يا رحاب خسمتك.. بخلت ليك بي حاجة
ويا وداد النارك.. تلعبت سهراجا
زايغة مني وليهو.. اصلو هو الخواجة
ليه تخلو الرادكم.. يبقى هو المهراجا
يروح يجيب توبازو.. وتصبحن فراجة
٭٭٭
يا أخي بس معقولة.. ترفسونا وتمشوا
تبدلونا بسرعة.. تجيبوا هوب ناس أشو
ادونا فرصة نعبر.. ان شاء الله بس ننكرشو
نحن لسع قلنا.. دايرين مغسنا نفشوا
٭٭٭
نبدأ من الاول.. نبدأ من ولدونا
في بلد مريافي.. شعفوفة والقهبونا
والخلق تعبانة.. فاكهتن ليمونة
وانتو سطحوا بينا.. اهلنا ما ورونا
الا القراية ام دق.. ومن غير درس دقونا
٭ والزواج تم كيف؟
- زوجتي الاولى الله يرحمها قضت معي 32 عاماً رائعة وجميلة اثمرت فاطمة في رابعة صيدلة بالاحفاد، ومحمد تانية طب بجامعة الجزيرة، وتهليل اولى علم نفس بالاحفاد، وعتاب اولى ثانوي، وانا كان عندي نظرية انو اي واحدة جميلة بكون وراها جيش من اولاد عمها، وممنوعة من الاقتراب والتصوير، او بتطلب مال خرافي، لذلك بديت اكون نفسي واخش بي قلب جامد بدون لف او دوران، وبقول طوالي انا زول عرس.
٭ نجحت طريقتك دي؟
- زوجتي عرفتها عن طريق خالها زميل دراسة معاي، كنت بمشي بيتهم وهم اسرة كريمة، وكانت زولة مطبخ ما بتحب الظهور، وعرفتها من يدها الطاعمة في ملاح الورق والخضرة بالكسرة، وحكيت لي امها بوضوح شديد موقفي المالي والاسري، زول ابوه مزارع عندو حمار واحد وسرقوه، وعند زوجة تانية وولد كبير كان معتقل لظروف سياسية، ولما وافقوا جبت أهلي في لوري بعد التخرج من الجامعة والعمل بالشركة الاميركية، وتم الزواج المبارك، وبعده انتقلت الى السعودية.
٭ ما تكون عمرة وزوغة؟
- لا سفرة جات بالصدفة شهر خمسة سنة 7891م من صديقي الصيدلي محمد عبد الله لاقاني قال لي تمشي السعودية، قلت ليه أيوه، قال لي امشي شارع الحرية لمكتب زول اسمو عثمان والاجراء ده ما تم خمسة يوم، وانا كنت هناك يوم 52 رمضان مندوب مبيعات بمؤسسة حليب الربيع بالرياض والمدينة والدمام، والغربة ما نفعت معاى قلت ليهم يا تجيبوا اولادي يا ارجع السودان، طبعاً السودانيين المعاى قالوا لي كلامك غلط، ودي فرصة ما بتلقاها، لكن اصريت ورجعت السودان.
٭ اشتغلت وين؟
- عملت في الكرين في سمسرة السيارات، وظهرت هيئة حلمنتيش بالتلفزيون القومي وانضميت ليها، وعملت من مكتب تجاري برنامج ارياف وبنادر، وعملت في مجال تجارة العملة، واستفدت من قرايتي في عائد الصادر والدولار والريال، وعملت مع حلمنتيش في عدد من المنتديات والمنابر، وكنا ماسكين الجو، وسنة 7991م مسكت ادارة الانتاج التجاري والاستثمار بتلفزيون ولاية الخرطوم، وقدمت برامج وايام مفتوحة وبرنامج «الاتجاه المشاكس» وعملت بقناة الخرطوم الدولية الراعية لبرنامج معرض الخرطوم الدولي، وعام 8991م عملت بدار اقرأ لتوزيع الصحف، وسنة 9991م تحقق حلمي ونلت الدبلوم العالي، وسنة 0002م سافرت بره البلد.
٭ تاني؟
- مشيت بالصدفة دبي في وظيفة مدير تنفيذي لشركة عقارات عن طريق صديق، ورجعت سريع منها، وعملت اعمال الرفيع التجارية، وسنة 5002م اتوظفت في تلفزيون السودان كتتويج لفكرة قديمة نشرتها في الجامعة، وقلت لزملائي وقتها المفروض الحكومة تدي كل خريج شاب ماهية 32 سنة مقدما وتقول ليه تعال بعد سن الـ 54 عشان تشتغل في وظيفة حكومية وترجع القروش القديمة، لأن الوظيفة محبطة وما فيها ابداع، وانا الآن بعد وبقدم وبنتج برنامج مسادير ومشاوير.
٭ والزواج التاني كان متين؟
- بعد العودة من الاغتراب امتلكت وسيلة كسب عيش عربة امجاد، ومع عملي في التلفزيون التقيت الزميلة ابنة المعلم والمعلمة الاستاذ ريم ابو سنينة، وتزوجت في عيد الضحية في ديسمبر سنة 7002م.
٭ عندك تجربة حالية في كتابة المقال الصحفي بطريقة جديدة كلمنا عنها؟
- اكتب في صحيفة «الحرة» عمود باسم «ما علينا» تحت شعار «ماذا علينا اذا كتبنا» اتناول فيه بكل شفافية مواضيع تهم المواطن وكلامي ضايق مسؤولين كتار وعمل لي مشاكل.
٭ اصطدمت بي منو؟
- مع والي سنار احمد عباس بسبب كتابات عن مشاكل الولاية الكثيرة، وتعقدت المشكلة لخصوصية العلاقة بيننا باعتبار اننا ابناء قرية واحدة هي الشمباتة، وابناء تنظيم واحد طبعا هو اكبر مننا سناً.
٭ سنار ما لها؟
- سنار ناقصا الكتير، يعني ولاية في حجم دولة ليها مكانتها التاريخية وعلمت الناس الحكم الراشد، وكانت مبادرة في تكوين جيش اسلامي وخزان ومصنع ادوية وتوليد كهرباء وغيرها، يعني سنار انا التاريخ بدا من هنا تلقى ظلم شديد ما تستاهلو.
٭ لو بقيت والي سنار بدل احمد عباس ح تعمل شنو؟
- بقدم استقالتي اول شيء لاسباب كثيرة، منها انو ابن المنطقة ما بقدر يخدم اهلو لانو بكونوا خاتين عليه امل كبير ورافعين سقف الاماني، واحمد عباس كان بخدم سنار من موقعو كمدير ناجح جدا لشركة ناجحة ليها مردودها الاجتماعي والاقتصادي، لكن بعد بقى والي بقى بتاع الكل وكترت الهموم ومداخل الامور.
٭ ونحن في شهر الصيام ادينا حبة من شهر الصيام شرفتنا؟
شهر الصيام شرفتنا
والنية ثابتة ممتنا
في سوقنا داك سمسمار كبير
كرعين غلاد شايلالا زير
يحلف كضب متيمنا
٭٭٭
يا داخلا سوق الدولار
نسمع همس وكلام جهار
بشويش يكون زي الغنا
٭٭٭
لو جيت على سوق الكرين
تلقى الاسود بره العرين
بدوك سعر مش ممكنا
٭٭٭
يا تاجرا زاد السعر
في يومو داك على وين تجر
يوم الوشوش مدفنا
٭٭٭
يا مرابيا بالع الربا
يوم الخشوم متربا
تعال قريب وقع هنا
٭٭٭
( تعليق: 0)
 إقرأ أيضاً: